Հայ կոմպոզիտորական արվեստի փառատոն

Հայաստանյան մշակութային կյանքում վերջին տարիների ընթացքում իր ուրույն և անփոխարինելի տեղն է զբաղեցնում Հայ կոմպոզիտորական արվեստի փառատոնը, որն արդեն 7 տարվա պատմություն ունի և որի ստեղծման գաղափարը դիրիժոր Սերգեյ Սմբատյանինն է:

Փառատոնն ուղղված է հայ դասական և ժամանակակից կոմպոզիտորների ստեղծագործությունների պրոպագանդմանը, հայ կոմպոզիտորական դպրոցի ավանդույթների պահպանմանը և աշխարհով մեկ դրա արդի նվաճումների ներկայացմանը:

Արտասահմանյան բազում համերգներից հետո Սերգեյ Սմբատյանը հանգեց մի անհերքելի եզրակացության. ժամանակակից հայ դասական երաժշտարվեստը մեծ պահանջարկ է վայելում ոչ միայն հայրենիքում, այլև դրա սահմաններից դուրս, հայ կոմպոզիտորների աշխատանքները հետաքրքիր և գրավիչ են օտարերկրյա ունկնդրի համար:

«Էդգար Հովհաննիսյանի կողմից 1993թ-ին գրված «Բարոկկո-կոնցերտը ջութակի համար» ստեղծագործությունն ապացուցեց, որ 20-րդ դարի հայ երաժշտությունը պարզ է և ներթափանցող, հարուստ և ցանկալի:

Կատարելով Էդվարդ Միրզոյանի լարայինների և հարվածային գործիքների համար գրված հայտնի Սիմֆոնիան (1962թ.)` երիտասարդ հայ երաժիշտները հմայեցին հանդիսատեսին…»

Մաթիաս Նեթեր, Բեռլին

Արդյունքում, 2010 թ.-ին Սմբատյանի նախաձեռնությամբ Հայաստանում ծնվեց Հայ կոմպոզիտորական արվեստի փառատոնի անցկացման գաղափարը: Նա նաև փառատոնի գեղարվեստական ղեկավարն է: Փառատոնը հանձն առավ իսկապես ազգանվեր մի գործ. պետք է թվայնացվեին դրա շրջանակներում հնչող բոլոր ստեղծագործությունները և իրականացվեր բոլոր համերգների ձայնագրություն, ինչը կապահովեր դրանց հետագա պահպանման հուսալիությունն ու ապագա սերունդներին անխափան փոխանցման վստահությունը: Սա էր ծրագրի առաքելությունն ու ամենամեծ ձեռքբերումներից մեկը: Փառատոնը ոչ թե պարզապես հերթական ժամանցային միջոցառումն է, այլ իսկապես բարձր արժեք՝ հատկապես մասնագիտական տեսանկյունից:  Կարևորելով փառատոնի դերն ու նշանակությունը հայաստանյան մշակութային կյանքում՝ ստեղծման առաջին իսկ օրից այն անց է կացվում ՀՀ նախագահ Սերժ Սարգսյանի հովանու ներքո և կառավարության աջակցությամբ:

Ամենամյա փառատոնը յուրաքանչյուր տարի նվիրվում է անվանի հայ կոմպոզիտորներից մեկին. Սարյան-ֆեստ (2010թ.), Բաբաջանյան-ֆեստ (2011թ.), Չուխաջյան-ֆեստ (2012թ.), Ռոմանոս Մելիքյան-ֆեստ (2013թ.), Տերտերյան-ֆեստ (2014թ.), Էդգար Հովհաննիսյան-ֆեստ (2015թ.), Միրզոյան-ֆեստ (2016թ.), Հարո Ստեփան-ֆեստ (2017թ.): Միջոցառումներ, որոնց շրջանակներում Հայաստանում գործող երգչախմբերի, նվագախմբերի և կամերային անսամբլների կատարմամբ հնչել են ավելի քան 300 ստեղծագործություններ (սկսած կամերային երկերից մինչև մեծակտավ ստեղծագործություններ): Համերգներ, որ հիմք հանդիսացան առցանց ռադիոյի ստեղծման համար, քանզի ներկայացված բոլոր ստեղծագործությունները պահանջված էին և ունեին իրենց ուրույն և լայն լսարանը:

Facebook